Ein af mest notuðu kryddolíunum á mínu heimili er hvítlauks chilli olía. Þessa bragðmiklu olíu er nauðsynlegt að eiga í ísskápnum og afar gott að nota á pizzur, sem marineringu, til steikingar á t.d. grænmeti eða kartöflum, salatdressing o.fl.
Hráefni
- Ólífuolía – virgin og extra virgin
- Hvítlaukur
- Chilli
- Fersk steinselja
- Salt & Pipar
Aðferð
Í þessari uppskrift miðast ég við að fylla nánast (80%) eina svona IKEA krukku eins og sést á myndunum.
Skerið gróflega niður 5 hvítlauksgeira og 1 chilli. Setjið í mortél ásamt svolitlu grófu salti og merjið.
Ég kaupi yfirleitt hvítlauk í Frú Laugu. Þar er hægt að fá ítalskan, lífrænt ræktaðan, rauðan hvítlauk sem er algjörlega frábær.
Setjið maukið í krukku. Saxið niður lúku af ferskri steinselju og bætið við ásamt nýmöluðum svörtum pipar. Hellið ólífuolíu saman við og hrærið í (ég nota 50% virgin og 50% extra virgin ólífuolíu). Smakkið til með salti og pipar en athugið þó að olían er best dagin eftir.
