Chimichurri kannast flestir við. Ljúffeng Argentísk kryddolía sem hægt er að nota sem meðlæti með öllu mögulegu en hentar afskaplega vel með grilluðum mat. Skelltu henni á grillaða nautasteik, grillaðan fisk, kjúkling eða notaðu sem marineringu fyrir kjöt eða fisk. Getur ekki klikkað!
Hráefni
- 1 skallotlaukur
- 1 rauður chilli eða jalapeno
- 3-4 hvítlauksgeirar
- 50ml rauðvínsedik
- Slatti af ferskri steinselju
- Slatti af fersku kóríander
- 2msk af óreganó (4 ef ferskt)
- 200ml GÓÐ kaldpressuð ólívuolía
Ég er svo heppinn að vera með garð þar sem ég get ræktað allavega jurtir. Ég sótti mér steinselju, kóríander og óregano ásamt litlum gulum matlauk sem ég notaði í staðin fyrir skallotlaukinn.
Aðferðin við olíuna er svo afskaplega einföld. Saxið allt hráefni eins smátt og þið nennið og blandið svo öllu saman. Einnig er hægt að setja allt nema olíu og edik í matvinnsluvél og púlsa nokkrum sinnum og blanda svo olíu og ediki eftirá.
Best er að láta olíuna standa í amk klukkutíma áður en bera á fram.
Svo er um að gera að frysta afganginn annaðhvort í boxi eða í klakaboxi og nota í hinar ýmsu sósur, súpugrunna eða marineringar!
